Ayaw makipagsapalaran ng PSC sa banta ng COVID-19

MANILA, Philippines — Habang nariyan ang banta ng COVID-19 ay hindi pa rin magdaraos ang Philippine Sports Commission ng kanilang mga pangunahing sports events na nakalatag ngayong taon.

Ang tatlo rito ay ang taunang Batang Pinoy, Philippine National Games, nilalahukan ng mga miyembro ng national team at ang Children’s Games for Peace.

Sinabi kahapon ni PSC Executive Director Atty. Guillermo Iroy na tuloy pa rin ang kanilang ginagawang pagpaplano at paghahanda sa iba pa nilang proyekto at prog-rama ngayong taon sa kabila ng banta ng COVID-19.

“Indefinite suspension pa rin pero tuloy pa rin ang planning and preparation not only for BP (Batang Pinoy) ang PNG but for other programs and event as well,” wika ni Iroy.

Noong Pebrero 6 ay pormal na inihayag ni PSC chairman William ‘Butch’ Ramirez ang pagkansela nila sa pagdaraos ng Batang Pinoy, PNG at Children’s Games for Peace.

“This is really se-rious. Why wait for the contamination? At this time, it’s better to prevent the spread of the infection,’’ ani Ramirez a COVID-19 na sinasabing nagmula sa Wuhan, China.

Hindi na rin itinuloy ng komisyon ang pagsasagawa sa Philippine Sports Summit sa Peb-rero 27-29 sa Philippine International Convention Center.

“Ang primary considerations lang ay ang precautionary and preventive measures as required by DOH (Department of Health),” wika naman ni Iroy.

Ilang qualifying tournaments naman sa China para sa 2020 Olympic Games sa Tokyo, Japan, idaraos sa Hulyo 24 hanggang Agosto 9, ang nauna nang inilipat sa ibang bansa bunga ng banta ng COVID-19.