2020 LBC Ronda Pilipinas Bordeos nagparamdam

SORSOGON, Philippines — Ipinaramdam agad ni Mark Julius Bordeos ng Bicycology Shop-Army ang kanyang lakas matapos manalo sa opening stage ng LBC Ronda Pilipinas 10th anniversary race na nagtapos sa harapan ng City Hall.

Kasama ng mga big guns, dumiskarte ang 24-anyos na si Bordeos sa huling isang kilometro ng laban.

At sa huling 500 metro ng karera ay saka humarurot si Bordeos na taga- Laoac, Pangasinan upang ungusan sa bakbakang labanan sina Jerry Aquino, Jr. ng Scratch It, Rustom Lim  7Eleven Cliqq-Air21 by Roadbike Philippines at George Oconer ng Standard Insurance-Navy.

“Alam ko bubuwelo si kuya Mac, (Galedo) kaya ang ginawa ko nagmasid muna ako sa likod, sabi ko kaya ko ito kasi kondisyon ako.” hayag ni private first class army na si Bordeos habang bumubuhos ang malakas na ulan.

Tumapos ng tatlong oras, anim na minuto at pitong segundo si Bordeos sapat upang angkinin ang unang stage sa 10 edition event kaya siya ang magsusuot ng pulang jersey ngayong araw sa Stage 2, 163km Sorsogon-Legazpi.

Parehong oras lang ang naitala nina Bordeos, Aquino, Lim at Oconer.

Ang nagbabalik na si Galedo ay lumanding sa fifth na may tatlong oras, anim na minuto at 10 segundo.

Ang iba pang nakapasok sa top ten ay sina James Mendoza, (7Eleven), Morales, Felipe, Mervin Corpuz, (7Eleven) at Alvin Benosa, (CCT).

Hinawakan naman ng Standard Insurance - Navy ang general team classification sa event na suportado ng LBC at inisponsoran ng Manny V. Pangilinan Sports Foundation kasama ang Versa, 8A Performance, Print2Go, Petron, Green Planet, Bike Xtreme, Standard Insu-rance, Spyder, CCN, Lightwater, Prolite, Guerciotti, Black Mamba, Boy Kanin, Vitamin Boost, NLEX-SCTEX, Maynilad, 3Q Sports Event Management Inc., LBC Foundation at PhilCycling habang pumangalawa ang 7Eleven Cliqq-Air21 kasunod ang Celeste Cycles PH-devel Project Pro Team.