Fil-Am nire-recruit para sa Gilas women’s

MANILA, Philippines — Mas lalong lalakas ang Gilas Pilipinas women’s national team dahil isang 6-foot-5 Filipino-American cager ang papasok sa tropa para sa pagsabak ng koponan sa iba’t ibang international tournaments.

Pormal nang inimbitahan ni Gilas Women head coach Patrick Aquino si Jenesis Perin na isang 16-anyos na manlalaro na kasalukuyang nag-aaral sa Lawrence Academy sa Massachusetts.

Nakuha ni Perin ang dugong Pinoy sa kanyang ina na purong Pilipino.

Inaasahang isasalang muna si Perin sa 5x5 at 3x3 events.

Target ni Aquino na isama si Perin sa FIBA Under-17 Asia Cup na idaraos sa Hunyo 4 hanggang 7 sa Cyberjaya, Malaysia.

Pinaplantsa na ng Samahang Basketbol ng Pilipinas (SBP) ang mga kinakailangang dokumento partikular na ang passport para maipormalisa ang paglalaro ni Perin suot ang jersey ng Pilipinas.

Malaking tulong si Perin sa national team.

Pakay ng Gilas Women na ipagpatuloy ang dominasyon nito sa Southeast Asian Games na idaraos sa susunod na taon sa Hanoi, Vietnam.

Magugunitang winalis ng Gilas Women ang 5x5 at 3x3 gold medals sa 2019 SEA Games na ginanap sa Pilipinas.

Sa kasalukuyan, si Clare Castro ang pinakamatangkad na manlalaro sa Gilas Women na may taas na 6-foot-6 habang 6-foot-5 naman si PSA Ms. Basketball awardee Jack Danielle Animam.