Khat Bell sasandalan ng Petron Blaze Spikers

MANILA, Philippines — Hindi mawawala ang pressure na nakakabit sa balikat ng Petron Blaze Spikers pero para sa kanilang reinforcement na si American winger Khat Bell, kailangan lang mag-focus sa mga dapat gawin ngayong 2020 Philippine Superliga (PSL) Grand Prix.

Balik-bansa si Bell para banderahan uli ang defending champions sa kampanya nilang makopo ang ikatlong sunod na titulo sa kumperensiyang ito.

“There’s always kind of pressure. Every one’s getting for us but I think, what’s most important is focusing on what we’re doing in the gym. It will decide our factor on the court,” sabi ni Bell. “Eve-ryone’s coming after us but I’m excited.”

Ito ang ikatlong beses na maglalaro sa local volleyball league si Bell na unang nagserbisyo sa Petron noong 2018 kaya masaya siyang muling makabalik dito.

Bagama’t excited na siyang ipamalas uli ang kanyang bangis sa PSL, hindi niya naitago ang pagkadismaya sa pagkawala ni Shaq delos Santos bilang head coach ng tropa na dalawang taon din niyang nakasama sa liga.

Matatandaan na sinibak ng Blaze Spikers si Delos Santos matapos ang masamang kampanya ng national women’s volleyball team sa nakaraang 30th Southeast Asian (SEA) Games at pinalitan siya ng veteran mentor na si Emil Lontoc.

“Coach Emil is great. Super nice. Kinda quiet but he’s vey open to suggestions. He kinda less to take over a little bit in drills,” aniya. “He loves that I also have idea for the team. It’s been great for us.”

Bagong Petron ang masasaksihan ngayong taon kasabay ng pagkawala ng ilang key players gaya nina Sisi Rondina, Bernadeth Pons, Rhea Dimaculangan, Mika Reyes, Chinchin Basas, Mela Tunay, Chloe Cortez at Denden Lazaro, pero ayon kay Bell ay solido ang kanilang 15-man roster.

“Totally different. We have some people coming back, we have Ces (Molina), Rem (Palma), and Aiza (Pontillas). We’re building with a lot of good girls. Our 15 roster is pretty solid,” sabi pa ni Bell.

Unang makakaharap ng Blaze Spikers ang Generika-Ayala Lifesavers sa unang araw ng import-laden conference na ito sa Pebrero 29 sa The Arena sa San Juan City.