Laro ng Ateneo at FEU nauwi sa scoreless draw
MANILA, Philippines — Sumandal ang Ateneo High School kay goalkeeper Artuz Cezar para idiskaril ang hangad ng Far Eastern University-Diliman na first round sweep sa UAAP Season 82 high school boys’ football tournament.
Nauwi sa goalless draw ang nasabing laro ng Ateneo at FEU sa Rizal Memorial Stadium.
Nanatili ang Blue Eaglets sa second place bitbit ang kanilang 7.0 points para makalapit sa league-leading Baby Tamaraws na may 10 points mula sa tatlong panalo at isang draw.
Matapos ang mintis na wide open shot ni Eric Laurel mula sa pasa ni Ace Amita ay nagpilit ang defending nine-time champions na maagaw ang panalo.
Ngunit napigilan naman ni Cezar ng Ateneo ang dalawang tangka ng FEU sa additional time para sa 0-0 pagkakatabla sa final whistle.
- Latest
