LA Clippers lusot sa Dallas

DALLAS – Nagbalik sa line-up ng Mave-ricks ang isa nilang big man ngunit nagkaroon ng injury ang kanilang sentro sa gabing nabigo silang pigilan ang reigning Finals MVP.

Kumamada si star forward Kawhi Leonard ng 36 points at kumonekta si Landry Shamet ng dalawang mahalagang three-pointers sa dulo ng fourth quarter para tulungan ang Los Angeles Clippers sa 110-107 pagtakas sa Mavericks.

“We just kind of found a way to win,” wika ni Shamet. “We’d loved to keep that lead the whole game, but that’s not how it’s going to be. It’s a long season. We got to find different ways how to win like we did tonight.”

Ito ang ikaapat na sunod na pananalasa ng Los Angeles na winakasan ang four-game winning streak ng Dallas.

Ang triple ni Shamet ang nag-angat sa Clippers sa 100-98 sa huling 2:48 minuto ng fourth period na sinundan ng dalawang free throws ni Montrezl Harrell para iwanan ang Mavericks sa 102-98.

Muling nagsalpak ng tres si Shamet para sa seven-point lead ng Los Angeles laban sa Dallas.

Tumapos siya na may 18 points.

Binanderahan naman ni star guard Luca Doncic ang Mavericks sa kanyang 36 points, 10 rebounds at 9 assists.

Kumamada siya ng 24 points sa second half para ilapit ang Dallas.

Bumalik naman sa aksyon si forward Kristaps Porzingis matapos ang 10 laro habang nagkaroon naman si center Dwight Powell ng right Achilles tendon injury sa first quarter.

“Guys like him define the culture we want here,” wika ni Mavericks coach Rick Carlisle. “It doesn’t get much tougher than this, if it ends up being what we fear it might.’”