Nunn nagbida uli sa miami heat

OKLAHOMA CITY — Muli na namang nagbida si rookie guard Kendrick Nunn matapos umiskor ng 22 points sa 115-108 pagpapaluhod ng Miami Heat laban sa Thunder.

Kumonekta si Nunn, ang two-time Eastern Conference Rookie of the Month na nagmula sa 33-point performance sa naunang panalo ng Heat kontra sa San Antonio Spurs, ng 9-of-17 fieldgoal shooting kasama ang 3-of-5 sa three-point line.

Nagdagdag si Bam Adebayo ng 21 points at 8 rebounds habang tumapos si Jimmy Butler na may 14 points at 10 rebounds para sa Miami.

“Whether you’re on the defensive end and you’re working on the schemes of everything, or it’s the offense and you’re getting in your bag and you’re working on shooting the ball — he’s cons-tantly in the gym working on his game,” sabi ni Butler kay Nunn.

Sa Toronto, umiskor si center Marc Gasol ng season-high 20 points at dinuplikahan ang kanyang career high na anim na three-pointers habang tumipa si Norman Po-well ng 28 markers para tulungan ang Raptors sa 140-111 paglampaso sa Washington Wizards.

Ito ang pinakamataas na iskor ng Toronto nga-yong season matapos ang 133-113 sa paggupo laban sa Cleveland Cavaliers noong Disyembre 16 at pinantayan ang kanilang franchise record para sa pinakamaraming puntos.

Dinuplika ni Terence Davis II ang kanyang career best na 23 points at may 18 at 15 markers sina OG Anunoby at Serge Ibaka, ayon sa pagkakasunod, para sa Raptors.

Sa Indianapolis, nagsalpak si Malcolm Brogdon ng isang tiebreaking 16-footer sa huling 18 segundo at kumamada si T.J. Warren ng 28 points para ihatid ang Indiana Pacers sa 116-114 pagtakas laban sa Minnesota Timberwolves.

Ito ang ikaapat na sunod na arangkada ng Indiana kasama ang nakaraang da-lawang laban sa Minnesota.

Sa Philadelphia, kumonekta si Furkan Korkmaz ng anim na 3-pointers at tumapos ng career-high 24 points para pangunahan ang 100-89 pagdaig ng 76ers sa Chicago.