PSC susuportahan ang athletics para sa 2020 Tokyo Olympics
MANILA, Philippines — Kagaya ng kanilang pangako, solidong suporta ang ibibigay ng Philippine Sports Commission sa mga national athletes na naghahangad na makakuha ng tiket para sa 2020 Olympic Games sa Tokyo, Japan.
Kamakalawa ay nakipagpulong ang PSC kay Philippine Athletics Track and Field Association (PATAFA), Inc. president, Philip Ella Juico sa PhilSports Complex para sa kanilang plano.
Natalakay ang pagsuporta ni PSC chairman William ‘Butch’ Ramirez sa Olympic programs nina pole vaulters EJ Obiena at Natalie Uy, sprinter-hurdler Eric Cray, runner Kristina Knott, shot putter Willie Morrison at marathoner Christine Hallasgo.
“We have to capitalize on the success of EJ Obiena and other track and field athletes at the 30th SEA Games, and give them full support on their Olympic qualifications” wika ni Ramirez.
Ang 24-anyos na si Obiena ang may pinakamalakas na tsansang makapag-uwi ng Olympic medal dahil sa kanyang pagiging No. 14 sa buong mundo.
Siya ang unang qualifier ng bansa para sa 32nd Olympiad matapos makuha ang qualifying standard na 5.81 meters sa isang torneo sa Chiara, Italy noong Setyembre.
Kasunod nito ang pag-angkin ni Obiena sa gold medal ng nakaraang 30th Southeast Asian Games.
Sa 2019 SEA Games ay kumolekta ang PATAFA ng kabuuang 11 gold, 8 silver at 8 bronze medals.
“Our goal is to sustain this momentum in the Olympics and 2021 in Vietnam. We thank the PSC for its support for our athletes,” ani Juico.
- Latest