TNT katropa malakas ang signal laban sa Meralco
MANILA, Philippines — Naging tinik sa lalamunan ng Meralco sina import KJ McDaniels at point guard Jayson Castro ng TNT Katropa.
Humataw si McDaniels ng 38 points at nagdagdag si Castro ng 17 markers para tulungan ang Tropang Texters sa 103-94 pagbugbog sa Bolts sa Game One ng kanilang semifinals series para sa 2019 PBA Governor’s Cup kahapon sa Smart Araneta Coliseum.
“During the break we worked hard sa practice, kaya maganda ang resulta” sabi ni Castro.
Mula sa six-point lead sa halftime ay humataw ang TNT Katropa sa third period para ilista ang 69-54 abante laban sa Meralco galing sa basket ni forward Troy Rosario.
Ang 3-point play ni McDaniels ang nag-akay sa Tropang Texters sa 87-65 bentahe sa 8:09 minuto ng final canto na napababa ng Bolts sa 85-93 sa huling 3:24 minuto.
May tsansa ang TNT Katropa na makalapit sa PBA Finals kung muling mananalo sa Game Two kontra sa Meralco bukas.
Samantala, pupuntiryahin naman ng NorthPort ang paglapit sa kanilang kauna-unahang PBA Finals appearance.
Nakatakdang labanan ng Batang Pier ang Ginebra Gin Kings sa Game Two ng kanilang semifinals series ngayong alas-7 ng gabi sa Big Dome.
Pinabagsak ng NorthPort ang mga Ginebra sa Game One, 124-90, kung saan naging balanse ang atake ng tropa ni coach Pido Jarencio.
Sa nasabing panalo ng Batang Pier ay kumolekta si import Michael Qualls ng 38 markers at 15 rebounds habang nagdagdag ng 24, 16, 14 at 11 markers sina Garvo Lanete, Christian Standhardinger, Sol Mercado at Sean Anthony, ayon sa pagkakasunod.
“We caught Ginebra on their off night,” wika ni Jarencio. “Ang haba rin kasi ng break.”
Binanderahan ni import Justin Brownlee ang Gin Kings mula sa kanyang 24 points, 19 boards, 6 assists at 2 blocks at may 21 markers si Stanley Pringle.
“They beat us in all facets of the game, so we’ve got to come back better the next time,” sabi ng two-time PBA Grand Slam champion coach.
Samantala, inaprubahan ng PBA Commissioner’s Office ang pagbibigay ng Magnolia kay veteran Aldrech Ramos sa Columbian kapalit ni Jackson Corpuz.
- Latest