3-Pinoy cue masters pasok sa World 9-Ball main draw
MANILA, Philippines — Tatlong Pinoy cue masters ang nagtala ng impresibong panalo para makahirit ng tiket sa main draw ng prestihiyosong 2019 World 9-Ball Championship kahapon sa Al Arabi Sports Club sa Doha, Qatar.
Pasok na sa knockout stage sina 2004 World 9-Ball champion Alex Pagulayan, Johann Chua at Jeffrey Ignacio kasama ang 29 pang cue masters na umabante sa susunod na yugto.
Naitarak ng Filipino-Canadian na si Pagulayan ang 9-3 panalo kay Max Eberle ng Amerika sa Group 10 habang namayani si Chua kay Liu Ri Teng ng Chinese-Taipei (9-3) sa Group 7.
Nailusot naman ni Ignacio ang 9-7 pana-naig kay Damianos Giallourakis ng Greece para angkinin ang isa sa apat na silya sa main draw sa Group 12.
Sa kabilag banda, nahulog sa losers’ bracket sina 2017 World 9-Ball titlist Carlo Biado at Jeri-co Bonus matapos magtamo ng magkaibang kabiguan sa kanya-kanyang group stage.
Lumasap si Biado ng 3-9 upset loss kay Enrique Rojas ng Chile sa Group 8 habang yumuko si Bonus kay John Morra ng Canada (7-9) sa Group 1.
Kailangan nina Biado at Bonus na maipanalo ang kanilang huling mga laban upang makapasok sa knockout stage ng torneong may basbas ng World Pool-Billiard Association.
Kailangang maipanalo ni Biado ang kanyang rubber match kay Hassan Shahada ng Jordan habang titipanin ni Bonus si Bashar Abdulmajeed sa hiwalay na do-or-die game sa event na may nakalaang $150,000 kabuuang papremyo kabilang ang $30,000 para sa magkakampeon.
Umusad din sa main draw sina defending champion Joshua Filler ng Germany, Denis Grave ng Estonia, Mieszko Fortunski ng Poland, Ko Pin Yi ng Chinese-Taipei, Liu Haitao ng China, Ralf Souquet ng Germany, Albin Ouschan ng Austria, Shane Van Boening ng Amerika at Chang Yu Lung ng Chinese-Taipei.
- Latest