2-golds sapul ni Martir

MANILA, Philippines — Dalawang gold me-dals ang ipinutok ng Team Philippines sa women’s shooting events ng 30th Southeast Asian Games kahapon sa Marine Corps Training Center sa Taguig City.

Pinagreynahan ni Marly Martir, isang Phi-lippine Navy officer, ang labanan sa women’s WA 1500 Precision Pistol Course para sa kanyang kontribusyon sa ratsada ng bansa sa overall medal standings.

Nagpaputok si Martir ng 1450-60x para talunin sina Kartikasari Pratiwi (1445-62x) ng Indonesia at Mohd Yusof Yusliana (1441-49x) ng Malaysia na nakuntento sa silver at bronze medal, ayon sa pagkakasunod.

Nakipagtulungan naman si Martir kina Elvie Baldivino at Franchette Quiroz para angkinin ang gintong medalya sa team category.

Nagtala ang tatlo ng pinagsamang 4320-161x para sa unang puwesto.

Ito ang unang dalawang gold medals ng national shooting team sa biennial event.

Sa individual event ay hindi sinuwerte sina Quiroz at Baldivino na mapitas ang gintong medalya nang tumapos sa ikaapat at pang-siyam na puwesto.

Nakatakdang iputok ang gold medal round ng mixed air rifle 10m at ang mixed benchrest air rifle (heavy varmint) ngayong araw. Magtatapos ang shooting event sa Dis-yembre 10.