Yulo, Pacquiao torchbearers; Obiena, Didal, 4 pa flag bearers
MANILA, Philippines — Pinal na ang desis-yon ni Philippine Sports Commission at Chef De Mission William ‘Butch’ Ramirez para sa anim na national athletes na babandera sa makulay at magarbong opening ceremonies ng 30th Southeast Asian Games sa Nobyembre 30.
Si world champion gymnast Carlos Edriel Yulo at Pinoy boxing champion Manny Pacquiao ang mga napiling torchbearers, habang magiging flag bearer naman sina Asian champions EJ Obiena (pole vault), Margielyn Didal (skateboarding), Kiyomi Watanabe (judo), Eumir Marcial (boxing), Nesthy Petecio (boxing) at Maggie Ochoa (jiu-jitsu).
Si Ochoa ang umangkin sa unang gold medal ng Pilipinas sa nakaraang 4th Jiu Jitsu Asian Championships sa Mongolia.
Nauna nang ikinunsidera ni Ramirez na maging isa sa mga flag bearers si 2016 Olympic Games silver medalist Hidilyn Diaz ng weightlifting ngunit hindi ito kasama sa listahan.
“It was me who on my capacity as CDM (Chef De Mission) who made the decision,” wika ni Ramirez. “We already informed the POC (Philippine Olympic Committee).”
Ang opening ceremony ng 2019 SEA Games ay gagawin sa Philippine Arena sa Bocaue, Bulacan.
Magiging malaking sorpresa sa lahat kung paano sisindihan ang SEA Games cauldron na nasa New Clark City na malayo sa opening ceremony venue sa Bulacan.
Gagampanan ng 19-anyos na si Yulo at ang eight division world champion na si Pacquiao ang pagsisindi ng SEA Games flame.
Nakamit ni Yulo ang makasaysayang gold medal victory sa FIG World Artistic Gymnastics Championship sa Stuttgart, Germany noong Oktubre.
Noong 2017 SEA Games sa Kuala Lumpur, Malaysia ay si taekwondo jin Kirstie Elaine Alora ang tumayong flag bearer ng Philippine contingent sa opening ceremony.
- Latest
