Knights itinadhana ang paghahari
MANILA, Philippines — Kapalaran talaga ng Letran Knights na makamit ang kanilang ika-18 titulo sa Season 95 NCAA men’s basketball tournament, ayon kay rookie head coach Bonnie Tan.
Tumapos lamang ang Knights sa ikatlong puwesto (12-6) sa double-round elimination, habang winalis ng 22-time champions na San Beda Red Lions ang elims.
“Playing a team like San Beda, 18-0, defending champion, alam nating mahirap pero again walang imposible sabi ko sa mga players,” sabi ni Tan.
“We have a lot of trials during the whole season naman. Lahat ng mga laban sa stepladder hindi naman ibinigay sa atin ng basta-basta. Ang mga panalo noon carried us. Iyong momentum, until this series,” sabi pa ni Tan na nakamit ang NCAA crown sa unang taon niya bilang head coach.
Kailangan ng Knights na dumaan sa butas ng karayom sa stepladder semis bago makarating sa best-of-three Finals.
Kabilang sa kanilang dinaanan ay ang 85-80 panalo kontra sa No. 4 San Sebastian Stags sa unang stepladder semis match at sinundan ng 92-88 paggupo sa No. 2 Lyceum Pirates sa ikalawang stepladder semis match.
Matapos talunin ang Red Lions sa Game One, 65-64, nabigo ang Knights sa Red Lions sa Game Two, 76-79, at marami na ang nagduda sa kanilang kakayahan na bumangon muli.
“There’s always a reason for everything. Iyon ang sinasabi ko sa mga players para hindi sila ma-down and madala pa rin ang momentum going to Game Three. Kasi, ‘yung pagkatalo namin sa Game Two maraming nagsasabi na hindi na raw kami makakabangon,” ani Tan.
Ngunit pinatunayan ng Knights na mali ang kanilang mga ‘doubters’ sa pamamagitan ng 81-79 panalo sa deciding Game Three para putulin ang tatlong sunod na taong paghahari ng Red Lions.
“Nakita ko ang maturity ng mga players when we went back sa drawing board sa practice namin. Instead of malungkot and magkagulo sila and sisihan, nagtatawanan pa sila. Iyon nagkampihan lang kami ng suwerte rin,” wika ni Tan.
- Latest