Philippine men’s at women’s beach volley teams isasabak sa 2019 Rebisco International Open
MANILA, Philippines — Bago sumabak sa darating na 30th edition ng Southeast Asian Games ang Philippine women’s at men’s beach volleyball national teams ay masusubok muna sila sa 2019 Rebisco Beach Volleyball International Open na hahataw sa Biyernes sa SM By The Bay sa Pasay City.
Makakaharap ng national squads sa nasabing 20-team, double-gender na torneo ang mga koponan mula sa iba’t ibang bansa kagaya ng Malaysia, Thailand, Hong Kong, Palau at New Zealand.
Ang torneo ay magkatuwang na inorganisa ng Larong Volleyball sa Pilipinas, Inc. at Beach Volleyball Republic kasama ang Rebisco.
Pinahalagahan naman ni team manager Cha Soriano ang suporta ng Philippine Sports Commission at Rebisco.
“With all the support we received, our teams are hoping to get far in this SEA Games,” sabi ni Soriano kahapon sa Philippine Sportswriters Association Forum sa Amelie Hotel in Manila.
Noong 2005 Manila SEA Games ay inangkin nina Diane Pascua at Heidi Ilustre ang bronze medal sa women’s division.
Bukod kay Soriano, bumisita rin sa PSA Forum na inihahandog ng San Miguel Corp., Braska Restaurant, Amelie Hotel at PAGCOR sina Larong Volleyball sa Pilipinas Inc. (LVPI) training director Peter Cayco, coaches Paul John Doloiras at Jason Gabales at physical therapists Faye Acordon at Carl Dimaculangan.
Bilang host ay binigyan ng karapatan ang Pilipinas na maglahok ng dalawang pares sa men’s at women’s division.
Lalaruin ang beach volleyball, naglalatag ng dalawang gold medals, sa Nobyembre 29 hanggang Disyembre 6 sa Subic.
Ang naturang three-day tournament ay bahagi ng pagsasanay ng dalawang Philippine teams para masukat at makita ang kanilang kahandaan para sa pagsalang sa regional biennial meet at iba pang international tournaments.
Pangungunahan nina Sisi Rondina at Bernadeth Pons ang women’s team kasama ang pares nina Dij Rodriguez at Dzi Gervacio.
Ito na ang ikalawang regional competition na lalahukan ng tambalan nina Rondina at Pons.
Unang nagpakitang gilas sina Rondina at Pons noong 2017 Asian Beach Volleyball Championships na ginanap sa Singapore kung saan nakalusot sila sa quarterfinals.
Samantala, ipaparada naman ng national men’s team ang pares nina Edmar Bonono at Jude Garcia at ang tambalan nina Krung Arbasto at James Buytrago.
- Latest