Galanza nagpasalamat kay Bundit
MANILA, Philippines — Nagbunga lahat ng pagod at sakripisyo ni Creamline outside hitter Jema Galanza matapos siyang pangalanan bilang Most Valuable Player ng katatapos lamang na 2019 Premier Volleyball League Season 3 Open Conference.
Doble itong selebrasyon para sa dating Adamson University Lady Falcons ace player dahil kasabay ng kanyang pagbulsa sa una niyang MVP award ay nadagit ng Cool Smashers ang back-to-back titles sa kumperensiya.
Bagama’t nanibago sa sistema ng pagsasanay at paghahanda sa mga kamay ng Thai coach Tai Bundit ay malaki pa rin ang pasasalamat niya rito dahil mas umangat ang antas ng kanyang laro.
“Ang sarap sa pakiramdam din kasi last year pa sobra ‘yung pagod ko kay coach Tai sa training, umiiyak ako sa kanya. Sumasakit ang ankle ko lagi sa kanya. Lahat ng paghihirap naranasan ko sa kanya,” pahayag ni Galanza.
“Now nakikita ko na nag-i-improve ako. Sobrang thankful ko kay coach Tai. Siyempre, sa mga teammates ko rin kasi kung hindi dahil sa kanila hindi ko magagawa iyon.”
Wala ring pagsisisi si Galanza sa kanyang pasya patungkol sa pagwi-withdraw sa national team pool dahil naging maganda naman ang resulta nito sa Creamline na nakuha ang kampeonato ng torneo.
Matatandaan na ilang linggo bago lumipad patungong Thailand ang Nationals para sumabak sa kanilang training camp at lumaban sa first leg ng ASEAN Grand Prix, ay umalis si Galanza sa training pool para mas pagtuunan niya ang Cool Smashers.
- Latest