Tigers pinapak ang Maroons
Pumuwersa ng ‘winner-take-all’ game
MANILA, Philippines — Humirit ng ‘do-or-die’ game sina Rhenz Abando at ang University of Santo Tomas matapos muling ilampaso ang University of the Philippines, 89-69, sa stepladder semis ng Season 82 UAAP men’s basketball tournament kahapon sa Smart Araneta Coliseum.
Nagtala ng tig-17 points sina Abando at UAAP MVP Soulemane Chabi Yo para makapuwersa ang Growling Tigers ng ‘winner-take-all’ game sa Miyerkules.
May solidong suportang 16 markers, 4 boards at 4 assists si Rookie of the Year Mark Nonoy, habang may 12 at 11 points sina Sherwin Concepcion at Cj Cansino, ayon sa pagkakasunod.
Ito ang ikatlong kabiguan ng Fighting Maroons sa Growling Tigers.
“It’s all about execution. Execution on both defense and offense. We executed our gameplan and lahat ng instructions ko ay sinusunod ng mga players.” ani UST coach Aldin Ayo
Sinamantala ng Growling Tigers ang 11 turnovers ng Fighting Maroons sa first half upang makuha ang maagang 17-point lead, 41-24.
Lumayo pa ang UST sa 50-31 mula sa basket ni Nonoy sa 5:55 minuto ng third period.
Sa pangunguna nina Juan Gomez De Liaño, Kobe Paras at Bright Akhuetie ay nakalapit ang UP sa 63-72 sa huling 3:13 minuto ng fourth period.
Nagtuwang sina Concepcion, Nonoy at Chabi Yo para makumpleto ang 13-2 atake ng Tigers.
- Latest