Eala kinapos sa Super Jr. netfest
MANILA, Philippines — Nasungkit ni Alexandra Eala ang runner-up trophy sa 2019 World Super Junior Tennis Championships-Osaka Mayor’s Cup na ginanap sa the Utsubo Tennis Center sa Osaka, Japan.
Nagkasya sa pilak ang fourth seed Pinay netter matapos lumasap ng 2-6, 4-6 kabiguan kay top pick at world No. 8 Diane Parry ng France sa championship round ng girls’ singles event.
Masaya si Eala sa kanyang pagtatapos dahil hindi birong makaabot sa finals ng isang International Tennis Federation (ITF) Grade A tournament tulad nito.
“Finished this incredible tournament a finalist. It’s a super experience here at the World Super Juniors,” pahayag ni Eala.
Nakapasok sa finals si Eala matapos maglista ng 6-3, 6-4 panalo laban kay 15th seed Mara Guth ng Germany sa semis habang namayani naman si Parry kay No. 7 Mai Napatt Nirundorn ng Thailand sa hiwalay na semis game, 6-4, 6-3.
Nauna nang iginupo ni Eala sina Erika Matsuda ng Japan sa first round, 7-6 (1), 6-3; Manami Ukita ng Japan sa second round, 6-0, 6-2; Diana Shnaider ng Russia sa third round, 6-1, 6-3; at Punnin Kovapitukted ng Thailand sa quarterfinals, 3-6, 5-2, 2-0 (retired).
Inaasahang muling aangat si Eala, No. 27 ranked, sa world ranking sa oras na ilabas ng ITF ang bagong listahan.
- Latest