Knights tutusukin ang best record sa MPBL
MANILA, Philippines — Pupuntiryahin ng San Juan Knights ang best record sa Maharlika Pilipinas Basketball League Lakan Season sa kanilang pagsagupa sa Muntinlupa Cagers bukas sa Filoil Flying V Centre sa San Juan City.
Makakatapat ng Knights ang Cagers sa ganap na alas-9 ng gabi.
Magtutuos naman ang Bataan Risers at Parañaque Patriots sa alas-6:30 ng gabi matapos ang upakan ng Rizal Xentro Mall Golden Coolers at Imus-Khaleb Shawarma Bandera sa alas-4 ng hapon.
Nasa tuktok ng 16-team North division bitbit ang kanilang 16-2 record, hangad ng Knights na maungusan ang Davao Occidental Tigers, tangan din ang 16-2 baraha, sa 15-team South division.
Sinandigan sina star gunner John Wilson at high-leapers Mike Ayonayon at Jhonard Clarito, tinalo ng Knights ang Valenzuela SVP Top Marketplace, 78-68, noong Oktubre 15.
Inaasahang tatalunin ng Knights ang Cagers, nagdadala ng 4-14 marka.
Samantala, ang ikaapat na sunod na panalo ang itatala ng Risers (10-8) sa pagharap sa Patriots (7-12).
Hangad naman ng Bandera (4-13) na makakalusot sila laban sa Rizal (3-12) na nasa four-game losing skid.
- Latest