Tigers nilapa ang Bulldogs
MANILA, Philippines — Nag-init ang opensa ng Growling Tigers sa third quarter para lapain muli ang NU Bulldogs, 88-76 na nagpakapit sa kanila sa ikalawang puwesto kahapon sa Season 82 UAAP men’s basketball tournament sa Ynares Center sa Antipolo City.
Nagtulungan sina Renz Abando, Mark Nonoy at Soulemane Chabi Yo sa 20-5 run tungo sa biggest lead na 58-35 sa 4:32 minuto ng ikatlong yugto.
Bahagyang naibaba ng NU ang kalamagan, 56-65 mula sa tres ni Shaun Ildefonso sa huling 18.6 segundo ng third quarter ngunit hindi nagpatinag ang Tigers at inilayo uli ang bentahe sa 88-68 sa likod ng tres ni Enzo Subido sa huling 3:42 minuto ng final canto.
“We played well, we were able to execute our game plan, lots of players stepped up.” ani coach Aldin Ayo “They just played basketball and they were having fun, they enjoy the game but we know, they’re doing that na may kasamang responsibility.”
Nagpasiklab si Chabi Yo ng 16 puntos, 14 rebounds at tatlong assist katuwang si CJ Cansino na may 15 puntos, limang boards sahog pa ang tig-tatlong assist at steal para isampa ang Tigers 7-5 win-loss record.
Bukod kina Cansino at Chabi Yo, tumulong din ng 14, 12, 9 puntos sina Enzo Subido, Nonoy at Renz Abando, ayon sa pagkakasunod.
Kapos naman ang 27 puntos, anim na rebounds at apat na assists ni Dave Ildefonso para sa Bulldogs na sibak sa 2-9 marka.
Sa iba pang laro, nagpakawala ng kabuuang 16 three-pointers ang FEU Tamaraws para suwagin muli ang DLSU Green Archers, 81-60 at umangat sa pang-apat na puwesto kapit ang 6-6 record.
Kumolekta ng tig-14 puntos sina LJ Gonzales at Ken Tuffin para itulak sa panlimang puwesto ang La Salle sa 5-6 karta. PJC
- Latest
