20-atleta sa 2020 Olympics - Ramirez

MANILA, Philippines — Kumpiyansa si Philippine Sports Commission chairman William ‘Butch’ Ramirez na aabot sa 20 ang mga Filipino athletes na maaaring lumahok sa 2020 Olympic Games na gagawin sa Tokyo, Japan.

Nauna nang nag-qualify sa 2020 Tokyo Olympics sina gymnast Carlos Edriel Yulo at pole vaulter Ernest John Obiena habang inaasahan namang susunod si weightlifter Hidilyn Diaz na bumuhat ng silver medal noong 2016 sa Rio de Janeiro, Brazil.

“If we come up with 20 qualified candidates, I think that will be one of the biggest Philippine delegations to the Olympics.” wika ni Ramirez. “Dapat kapag may mga batang potensyal, ibuhos na natin ‘yung suporta.”

Ang pinakamaraming bilang ng atletang naisabak ng bansa sa Olympics ay 53 noong 1972 kasama dito ang national basketball team na pinamunuan ni Caloy Loyzaga.

Ang silver medal naman ni light flyweight Mansueto “Onyok” Velasco Jr noong 1996 Olympics sa Atlanta, Georgia ang pinakamataas na medal-yang nakamit ng bansa.

Noong 2016 Olympics, kabuuang 13 atleta ang isinabak ng Pilipinas, kasama dito sina Diaz, long jumper Marestella Torres, swimmers Jessie Lacuna at Jasmine Alkhaldi at table tennis player Ian Lariba na pumanaw sa edad na 23-anyos dahil sa sakit na acute myeloid leukemia noong Setyembre 8, 2018.

Ang iba pang miyembro ng nasabing delegasyon ay sina taekwondo jin Kirstie Alora, boxer Charly Suarez, golfer Miguel Tabuena, judoka Kodo Nakano at trackster Eric Shauwn Cray at marathoner Mary Joy Tabal.

Tanging si Diaz lamang ang nakapag-uwi ng silver medal. Maliban kay Diaz, umaasa rin si Ramirez na makakakuha ng tiket para sa 2020 Tok-yo Olympics sina boxers Nesthy Petecio at Eumir Felix Marcial, 2018 Asian Games gold medalist Margielyn Didal sa skateboarding at Fil-Japanese judoka at 2018 Asiad silver medal winner Kiyomi Watanabe.

Nakasabay ni Yulo na kumuha ng gold medal si Petecio nang magreyna sa women’s featherweight division ng 2019 AIBA World Women’s Boxing Championships sa Ulan-Ude, Russia.

Siya ang naging ikalawang Pinay world boxing champion matapos si Josie Gabuco noong 2012.

Nanggaling din sa matagumpay na kampanya sina Diaz at Marcial matapos kumuha ng dalawang bronze medals sa women’s 55-kilogram class ng 2019 IWF World Weightlifting Championships sa Pattaya, Thailand at silver me-dal sa 2019 AIBA World Boxing Championships sa Ekaterinburg, Russia, ayon sa pagkakasunod.