Ginang napunggit sa PUJ patay

CEBU, Philippines — Patay   ang usa ka 55- anyos  nga babayeng nadasmagan og jeep de  paheroan dihang kini nilabang sa National Highway sa may Sitio  Guiwanon,  Barangay  Poblacion, Lungsod sa Compostela sa miaging Miyerkules  sa gabii.

Si  Traffic  Enforcer  Wilfredo   Gahi  sa  Lungsod sa Compostela  miila  sa biktima nga mao si Rowena  Dy  Deretcho, taga Barangay  Molaw sa nahisgotang lungsod.

Matud  pa ni Gahi  paingon sa  Dakbayan  sa Danao  ang  PUJ  nga puno sa pasahero  nga gimaneho  ni Reneboy  Quiray, 30, taga Quarry,  Barangay   Suba  sa  Dakbayan  sa Danao. Dugang pa ni Gahi, si Quiray mitug-an nga kalit nga milabang  sa karsada  ang biktima apan kalit kining mibalik sa iyang agi hinungdan nga naabtan gyud kini sa iyang sakyanan. Dali  nga gikarga  sa drayber  ang biktima ug gidala sa Danao  District  Hospital  apan  gideklarar  kini  sa mga doktor   nga dead on  arrival. Si  Quiray boluntaryong nitahan sa iyang kaugalingon ngadto sa kapolisan sa Consolacion human sa hitabo. Giandam na ang kasong reckless imprudence  resulting   to  homicide batok   sa maong drayber. (/IBM)(BANATNEWS)