Casimero umiskor ng TKO

MANILA, Philippines — Isang tenth round knockout win ang kinuha ni Johnriel Casimero para mapanatiling suot ang kanyang interim bantamweight crown kamakalawa ng gabi sa San Andres Sports Civic Center sa San Andres, Manila.

Pinabagsak ni Casimero si Mexican challen-ßger Cesar Ramirez via tenth-round knockout para matagumpay na maidepensa ang hawak na World Boxing Organization belt.

Ginawa ito ni Casimero sa harap ni Filipino world eight-division champion Manny Pacquiao ng MP Promotions. Itinigil ni referee Ramon Pena ang laban sa huling 2:23 minuto ng round 10 kasabay ng pagdiriwang ni Casimero.

Nauna nang pinatumba ni Casimero si Ramirez sa third at seventh round, habang nabigyan siya ng mandatory 10-count ni Pena dahil sa sinasabing pagkakadulas niya sa fifth round mula sa suntok ng Pinoy champion.

Sa naturang round ay halos mawalan ng hangin si Casimero bunga ng ginawang pagbabawas ng timbang para umabot sa weight limit na 118 pounds noong Biyernes.

Ngunit nagawa ni Casimero na malampasan ang kanyang panghihina sa pamamagitan ng kanyang mga kombinasyon sa mukha at katawan ng Mexican fighter.

Pinaganda ni Casimero ang kanyang ring record sa 28-4-0 win-loss-draw kasama ang 19 KOS.

Dahil dito ay nakalinya siya bilang mandatory challenger para sa regular WBO bantamweight title na hawak ni Zolanie Tete ng South Africa.

Bumaba naman ang kartada ni Ramirez sa 18-4-0 (11 KOs).

Sa undercard, pinabagsak ni World Youth bronze medalist Criztian Laurente si Christian Gabayeron sa loob lamang ng 32 segundo sa kanilang lightweight bout.

Umiskor naman si Olympian Charlie Suarez ng first-round KO victory laban kay Virgil Puton sa lightweight match.

Ito ang parehong ikatlong sunod na KO win nina Laurente at Suarez.