Lady Troopers pinaluhod ang Flying Titans

MANILA, Philippines — Limang sets ang ki­na­ilangan ng PacificTown-Army para dagitin ang ika­lawang sunod na pa­na­lo laban sa Choco Mu­cho, 39-41, 19-25, 25-19, 25-20, 15-12, sa Premier Volleyball League (PVL) Season 3 Open Confe­rence kahapon sa The Are­na sa San Juan City.

Umabot ng halos dala­wang oras at 34 minuto ang itinagal ng nasabing laro.

Gumawa rin ng ka­saysa­yan sa PVL ang na­sabing bakbakan sa pagpoposte ng set score na umabot sa 40.

Nanguna para sa Lady Troopers si Jovelyn Gonzaga na rumehistro ng tri­ple-double na 24 points mu­la sa 23 attacks, 26 ex­cellent digs at 16 excellent receptions.

Nanggaling si Gonzaga sa pagtulong sa Cignal HD Spikers na makuha ang five-set win laban sa Petron Blaze Spikers sa ka­nilang semifinals duel sa Philippine Superliga no­ong Martes.

Pumalo naman ng 21 mar­kers si Honey Royse Tubino.

Nag-ambag din sina Ne­ne Bautista at Lut Ma­laluan ng 13 at 8 points, ayon sa pagkakasunod.

“Padamihan na lang kami ng bala. Iyo na lang ‘yun eh. Parehas silang may bala. Kung sino ‘yung unang pumutok hin­di ba?,” wika ni Pa­ci­ficTown-Army head coach Kungfu Reyes sa Cho­co Mucho.

“Iyong art of war namin, slowly but surely na­gawa namin. Sumabay kami noong una pero nakita mo naman kahit na veteran na itong mga ito kaya naming sumabay sa kanila,” dagdag pa ng mentor.

Pukpukan ang na­ging laban ng dalawang tropa at parehong hindi bumi­bitaw.

Sa unang pagpalo pa lamang ng laro ay si­na­bayan ng mas beteranong Lady Troopers ang mas batang Flying Titans na nagpahapo sa kanila sa su­munod na set.

Pagpasok ng third at fourth set ay nag-iba ang inilaro ng Lady Troo­pers.

Umariba sila nang husto para nakawin ang nasabing set at ipuwersa sa isang gitgitan na decider kung saan nagtabla sa 10 ang laro sa likod ng 5-0 na atake ng Choco Mu­­cho.

Ngunit kinapos ang Flying Titans para ma­na­kaw ang panalo.

“Talagang padamihan kami ng bala. Hanggang sa dulo pumuputok kami na malaking bagay para sa amin,” sabi ni Reyes.

Magkatuwang naman sina Kat Tolentino at Mad­die Madayag na tu­ma­pos na may 23 points para sa Choco Mucho.

Nadulas ang baraha ng Flying Titans sa 1-1.