Bagong casualty sa Gilas squad
MANILA, Philippines — Sunud-sunod na dagok ang nalasap ng Gilas Pilipinas kung kailan papalapit na nang papalapit ang kampanya nila para sa 2019 FIBA World Cup ngayong buwan.
Ito ay dahil sa pagkakatamo ni gunner Matthew Wright ng injury upang dumagdag sa humahabang listahan ng injured players ng Nationals.
Nakaramdam si Wright ng right ankle pain kaya’t hindi muna nakapagpagpatuloy sa ensayo kamakalawa ng gabi sa Meralco Gym.
Nakatakdang magpa-MRI (magne-tic resonance imaging) MRI si Wright ngayon upang malaman ang tunay na diagnosis ng kanyang right ankle.
Sa kabila naman nito ay siniguro ni Wright na makakahabol siya sa ensayo at handa nang maglaro ulit sa oras ng World Cup proper sa Foshan, China na nakatakda mula Agosto 31 hanggang Setyembre 15.
Matatandaang sa sinalihan nilang training camp at pocket tournament sa Spain ay nadale na ang dalawang manlalaro nito ng injury.
Nagtamo si Gabe Norwood ng mild groin injury habang mild ankle sprain naman ang kay Poy Erram.
Bukod pa ang tatlong manlalaro kay Marcio Lassiter na noong nakaraang buwan ay nadale ng MCL spain sa noon ay idinaraos na 2019 PBA Commissioner’s Cup.
Sa kabila nito ay patuloy ang ensayo ng Gilas ngayon sa pangunguna ng mga healthy players na sina Andray Blatche, Raymond Almazan, Japeth Aguilar, Paul Lee, Mark Barroca, Ro-bert Bolick, CJ Perez, Kiefer Ravena, RR Pogoy, Beau Belga, Troy Rosario at June Mar Fajardo.
Mayroon na lang lagpas isang linggo ang Gilas bago ang kampanya nito sa world stage kung saan makakalaban nito ang Serbia, Italy at Angola sa Pool B.
Bago naman sila lumipad patungong China sa Agosto 29 ay sasalang muna sila sa dalawang final na tuneup games kontra sa Australian team na Adelaide 36ers sa Agosto 23 at 25 na magiging basehan ni head coach Yeng Guiao sa pagpili ng kanyang final 12 line up.
- Latest