Gilas makukumpleto matapos ang PBA Finals
MANILA, Philippines — Ngayong tapos na ang giyera sa 2019 PBA Commissioner’s Cup ay magsasanib-puwersa na ang mga magkaribal para magsuot ng iisang uniporme at magbandera ng iisang bandila sa Gilas Pilipinas.
Inaasahan ang pagsali kaagad nina five-time PBA MVP June Mar Fajardo ng San Miguel, Roger Pogoy at Troy Rosario ng Talk ‘N Text sa pagpapatuloy ng training camp ng Nationals sa Meralco Gym para sa nalalapit na 2019 FIBA World Cup.
Hindi nakasali sa mga nakaraang linggong pagsasanay ng Gilas maging sa kanilang Spain trip sina Fajardo, Rosario at Pogoy dahil sa mid-season conference championship series na pinagwagian ng Beermen laban sa Tropang Texters kamakalawa.
Sa pagdating ng tatlong inaabangang manlalaro ay kumpleto na ang koponan ni head coach Yeng Guiao at makakatodo na sa ensayo dalawang linggo bago ang world basketball championships na nakatakda sa China mula Agosto 31 hanggang Setyembre 15.
Walang pahi-pahinga sa tatlong players para masamahan kaagad nila ang mga regular practice attendees na sina Paul Lee, Mark Barroca, Gabe Norwood, JP Erram, Raymond Almazan, Japeth Aguilar, Matthew Wright, Kiefer Ravena, Beau Belga, naturalized player Andray Blatche at rookies CJ Perez at Robert Bolick.
Simula ngayon ay araw-araw na ang ensayo ng Gilas upang makapaghanda rin sila sa huling dalawang tune-up games kontra sa Aussie team na Adelaide 36ers sa Agosto 23 at 25 sa Meralco Gym.
Matapos ang naturang friendly game ay inaasahang ihahayag ni Guiao ang kanyang Final 12 bago lumipad patungong Foshan, China sa Agosto 29.
Nasa Pool B ng quadrennial basketball tilt ang Gilas Pilipinas kontra sa European powerhouses na Serbia at Italy at Angola.
- Latest