Banko Perlas, Air Force kapwa hangad makabangon sa kabiguan
MANILA, Philippines — Kapwa susubukan ng BanKo Perlas at Air Force na makabalik sa porma sa kanilang bakbakan sa Premier Volleyball League Season 3 Open Conference sa The Arena sa San Juan City.
Maglalaban ang dalawang tropa ngayong alas-6 ng gabi.
Hindi naging maganda ang simula ng pagbabalik sa PVL ng Lady Jet Spikers nang lampasuhin sila ng nagdedepensang Creamline via three straight sets, 23-25, 20-25, 15-25 noong nakaraang linggo.
Hindi gumana ang mga beterano ng tropa na sinandalan nila sa pangunguna nina Judy Caballejo, Wendy Semana, Del Palomata, Joy Cases at May-Ann Pantino at nalasap ang unang kabiguan.
Samantala, natikman ng Perlas Spikers ang una nilang pagkatalo sa kamay ng PacificTown-Army Lady Troopers, 23-25, 23-25, 25-17, 20-25, kamakailan.
Muling babandera para sa BanKo Perlas sina Dzi Gervacio, Nicole Tiamzon, Ella de Jesus, Kathy Bersola, Sue Roces at Jem Ferrer.
Sisimulan naman ang double-header na ito sa laban sa pagitan ng Motolite at bagong saltang Chef’s Classics sa alas-4 ng hapon.
Muling aasahan ng Motolite ni coach Godfrey Okumu sina Myla Pablo, Isa Molde, Tots Carlos, Maristela Layug at ang setter na si Iris Tolenada.
Bago man sa liga ay asahan nang makikipagsabayan sa torneo ang Chef’s Classics Red Spikers ni coach Nemesio Gavino na mamanduhan nina Nieza at Jezie Viray, Justine Tiu at Lynsey de Jesus.
- Latest