Win No. 13 ipoposte ng Petron kontra sa Foton
MANILA, Philippines — Susubukang iposte ng Petron Blaze Spikers ang ika-11 sunod na panalo, habang nais bumalik ng Foton Tornadoes Blue Energy sa win-column sa 2019 Philippine Superliga All-Filipino Conference sa Corpus Christi Gymnasium sa Cagayan de Oro City.
Maghaharap ang dalawang powerhouse teams ngayong alas-6 ng gabi.
Bitbit ng defending champions ang bentahe matapos dungisan ang malinis na record ng F2 Logistics sa bisa ng five-set victory, 26-28, 27-29, 25-19, 25-20, 15-6, noong Huwebes.
Umariba para sa Blaze Spikers si UAAP Season 81 MVP Sisi Rondina katuwang sina Ces Molina, Mika Reyes at Bernadeth Pons para manakaw ang top spot sa torneo.
Pero kahit nagawang makabawi ng kanyang tropa kontra sa Cargo Movers ay ayaw magpakumpiyansa ni Petron head coach Shaq delos Santos sa mga natitira nilang mga laro.
“Stay humble pa rin kami, hindi kami puwedeng maging complacent. Mas kailangan naming mag-double time para sa mga susunod naming games,” sabi ni Delos Santos.
Muling huhugot si Delos Santos sa malalim niyang line-up sa pamumuno nina Molina, Rondina, Reyes, Pons, Aiza Maizo-Pontillas, Remy Palma at Denden Lazaro.
Samantala, susubukan ng Blue Energy na makabawi at bumalik sa porma matapos matalo sa HD Spikers, 23-25, 25-21, 14-25, 21-25.
Ibabandera ng Foton ni coach Aaron Velez ang magkapatid na sina Jaja Santiago at Dindin Santiago-Manabat kasama sina Elaine Kasilag, Mina Aganon, Marian Buitre at Jen Reyes.
Matapos ang double round eliminations ay diretso ang lahat ng tropa sa knockout quarterfinal round. Fergus E. Josue, Jr.
- Latest