Mighty Sports hari ng Jones Cup
MANILA, Philippines — Pormal nang itinanghal na kampeon ang Mighty Sports sa 41st William Jones Cup matapos gapiin ang home team Chinese-Taipei B, 81-71, kahapon sa Xinzhuang Gym sa New Taipei City sa Taiwan.
Kamakalawa pa lang ay naibulsa na ng Mighty Sports ang titulo matapos idikdik ang isa pang host team na Chinese-Taipei A, 97-74.
Subalit hindi pa rin ito nagpapigil kontra sa Taipei B nang umiskor ng kumbinsidong 10-point win para makumpleto ang 8-0 sweep sa Asian tourney.
Dinomina ng Mighty Sports ang buong torneo sa 21.5-puntos na winning margin matapos ibaon ang Iran (98-72), Jordan (90-76), Japan (94-59), Canada (116-87), South Korea (89-82) at Indonesia (94-66).
Trumangko sa atake ng koponan si import Eugene Phelps na tumabo ng 24 points at 13 rebounds.
Humalili naman sa injured na si Renaldo Balkman ang baguhang import na si McKenzie Moore na naglista ng 16 points, 3 rebounds, 5 assists at 4 steals upang suportahan si Phelps.
Nagtapos ang Chinese-Taipei B na may 2-6 baraha para sa ikaanim na puwesto sa nasabing torneo.
Winalis din ng Mighty Sports ang kampeonato ng Jones Cup noong 2016.
Ito ang ikaanim na titulo ng Pilipinas sa torneo matapos magwagi ang Northern Cement (1981), San Miguel (1985), RP Centennial Team (1998) at Gilas Pilipinas (2012).
- Latest
