Kailangang lumaban ng Mighty Sports
MANILA, Philippines — Wala pang kasiguraduhan ang asam na kampeo-nato ng pambato ng Pilipinas na Mighty Sports sa idinaraos na 41st William Jones Cup sa New Taipei City sa Taiwan.
Ito ay sa kabila ng malinis nitong 6-0 baraha papasok sa huling dalawang laro nito sa prestihiyosong eight-team Asian invitational tourney.
Sasagupain pa ng Philippine bet ang home teams na Chinese Taipei B ngayong Linggo at Chinese Taipei A kagabi habang isinusulat ang balitang ito.
Nasa tuktok ng team standings ang Mighty Sports ngayon matapos ang mga dominanteng panalo kontra sa Iran (98-72), Jordan (90-76), Japan (94-59), Canada (116-87), South Korea (89-82) at Indonesia (94-66).
Subalit nasa likod nila ang SoKor (5-1) gayundin ang Chinese-Taipei A (5-1) kaya’t krusyal ang ginaganap pa nitong laban kontra sa naturang home team.
Sa format ng Jones Cup, walang playoffs na magaganap bagkus ay tatanghalin na kampeon ang may pinakamagandang record sa pagtatapos ng single round robin elimination round.
Kung matatalo ang reinforced Pinoy Team sa mga huling laban nito ay maaari pa silang masilat sa unang puwesto ng parehong SoKor at Chinese Taipei A.
- Latest