Letran lusot sa OT
MANILA, Philippines – Nangailangan ang Letran Knights ng overtime period bago itakas ang 82-80 panalo kontra sa Perpetual Help Altas habang nagwagi rin ang Lyceum Pirates laban sa Mapua Cardinals, 79-71 sa pagpapatuloy ng Season 95 NCAA basketball tournament kahapon sa FilOil Flying V Arena sa San Juan City.
Nag-ambag ng pitong puntos sina Ato Ular at Bonbon Batiller sa kabuuang 12 ng Letran sa extra period upang makamit ang ikatlong sunod na panalo at manatili sa solo fourth spot sa likuran ng three-peat champion San Beda Red Lions (3-0), San Sebastian Stags (2-0) at St. Benilde Blazers (2-0).
Ang tanging talo ng Letran ni rookie coach Bonnie Tan ay sa 94th season runner-up Lyceum Pirates, 80-84 sa opening day noong Hulyo 7.
Ang Altas naman ni coach Frankie Lim ay nakatikim sa ikalawang sunod na talo para sa 1-2 win-loss kartada.
“A win is a win, but we still need to learn how to close out games. Well-coached ‘yung kalaban, pero we stuck to our game plan,” sabi ni Tan.
Mayroon pa sanang sapat na oras ang Altas na ipursige ang ikalawang extension period ngunit nagmintis si Jielo Razon mula sa baseline na siyang nagbigay daan upang itakas ng Knights ang panalo.
Tumipa si Batiller ng 22 puntos habang si Ular ay umani ng career-high na 19 puntos na may kasamang 13 rebounds at isang block at 10 kay Larry Muyang. Tumulong naman ng tig-siyam na puntos bawat isa sina Jeo Ambohot at Jerrick Balanza para sa Letran.
Sa ibang laro, tumapos si Jaycee Marcelino ng 14 puntos, pitong rebounds, dalawang assists at dalawang steals, habang si Toci Tansingco ay gumawa ng season-high na 14 puntos din para masungkit ng Pirates ang ikalawang panalo sa tatlong laro at makabawi sa kanilang naunang 82-84 pagkatalo laban sa Emilio Aguinaldo Generals noong Hulyo 12.
Sa juniors’ division, tinambakan ng Letran Squires ang Perpetual Help Altalettes, 70-52, upang makuha ang unang panalo sa apat na laro at inilampaso ng Lyceum Junior Pirates ang Mapua Red Robins, 101-66, para sa ikatlong sunod na panalo.
- Latest
