Meralco, Alaska magpe-playoff

MANILA, Philippines — Tinapos ng Meralco ang limang sunod nilang kamalasan para makamit ang hinahangad na playoff sa pangwalo at huling silya sa eight-team quarterfinal round.

Nagsalpak si import Delroy James ng dalawang mahalagang salaksak sa hu-ling minuto ng final canto para itakas ang Bolts laban sa San Miguel Beermen, 95-91, sa pagtatapos ng elimination ng 2019 PBA Commissioner’s Cup kahapon sa Smart Araneta Coliseum.

Nagtabla sa 4-7 ang baraha ng Alaska, Meralco at Phoenix at dahil may mas mababang 0.977 quotient ang Fuel Masters ay ang Aces (1.012) at Bolts (1.011) ang maglalaban para sa No. 8 ticket.

“We just fought. If we come and fight we’ll give ourselves a chance to win,” sabi ni James, humakot ng 34 points, 6 assists, 5 rebounds, 4 steals at 2 blocks para sa tropa ni one-time PBA Grand Slam champion coach Norman Black. “One game at a time. Every game we improve. We just have to play our game.”

Nagdagdag si Chris Newsome ng 20 points, 6 boards at 4 assists habang may 15 at 10 markers sina Raymond Almazan at Brian Faundo, ayon sa pagkakasunod.

Dahil sa pagwawakas ng kanilang three-game winning streak ay posibleng mahulog ang San Miguel, may mababang quotient sa No. 7 at makakatapat ang No. 2 team na magdadala ng ‘twice-to-beat’ advantage sa quarterfinals, depende sa magi-ging resulta ng ikalawang laro kagabi sa pagitan ng TNT Katropa at Magnolia.

Nakuha ng Bolts ang 93-91 abante mula sa layup ni James sa huling 1:03 minuto ng fourth quarter.

Ang tapik ni James sa bolang hawak ni San Miguel reinforcement Chris McCullough ang nagresulta sa kanyang drive para ilayo ang Meralco sa 95-91 sa nalalabing 32.3 segundo.

Naimintis naman ni McCullough ang dalawa niyang free throws sa posesyon ng Beermen sa huling 21.9 segundo na sumelyo sa panalo ng Bolts.