Kiefer Ravena puwede nang mag-practice sa Gilas
MANILA, Philippines — Matapos ang 16 buwan, maaari na sa wakas magbalik sa hardcourt action si Kiefer Ravena.
Subalit hindi pa sa opisyal na laro kundi sa ensayo muna kaya’t inaasahang makikipagsanay na siya ngayon sa Gilas Pilipinas na magpapatuloy sa kanilang FIBA World Cup training camp sa Meralco Gym.
“It’s a long and crazy process but we’ll go through every step of the way. People will never understand what I went through. This experience has made me tougher, hungrier and a lot wiser,” anang 25-anyos na si Ravena. “My story will continue once again.”
Matatandaang noong nakaraang Mayo ay napatawan si Ravena ng 18-buwang suspensyon ng International Basketball Federation (FIBA) matapos mag-positibo sa banned substances ng pederasyon.
Dahil dito ay hindi maaaring magsanay o makasama man lang ang kanyang koponan sa Phi-lippine Basketball Association (PBA) na NLEX gayundin ang Gilas Pilipinas sa idinaraos na FIBA World Cup Asian Qualifiers.
Subalit sa wakas ay maaari na siyang magsanay ngayon saktong dalawang buwan bago magtapos ang kanyang suspensyon sa Agosto 24.
Ibig sabihin nito ay puwede nang makipag-ensayo si Ravena sa PBA mother team na NLEX gayundin sa Gilas na magbabalik sa training camp nito ngayon matapos magsimula sa pagsasanay noong nakaraang linggo.
Dagdag pa rito, ang pormal na pagbabalik ni Ravena sa Agosto 24 ay sasakto rin upang ma-ging available siya sa final roster kung sakali para sa World Cup na magaganap sa China mula Agosto 31 hanggang Setyembre 15.
Nauna na ngang sinabi ni Gilas head coach Yeng Guiao na isa si Ravena na kinukunsidera ng koponan na ipalit sa batikang point guard na si Jayson Castro.
Kamakalawa kasi ay nagpaalam pansamantala si Castro na hindi muna makakasali sa World Cup upang ilaan ang panahon sa kanyang pamilya na hindi niya naasikaso sa dire-diretsong paglalaro para sa bayan simula pa 2013. Nagpahiwatig din si Castro ng retirement mula sa national team.
Bukod kay Ravena, inaasahan ding ang pagdalo ng mga original pool members na sina June Mar Fajardo, Japeth Aguilar, Raymond Almazan, JP Erram, Gabe Norwood, Troy Rosario, Marcio Lassiter, RR Pogoy, Scottie Thompson, Paul Lee at Mark Barroca.
- Latest
