Sotto, Edu aasahan

MANILA, Philippines — Sa pangunguna ng twin towers nina Kai Sotto at AJ Edu, ipaparada ng Gilas Pilipinas youth ang pinakamalaki’t pinakamalakas na youth team sa kasaysayan ng Philippine basketball.

Subalit kalakip noon ay ang higante ring misyon na magpamalas ng maugong na kampanya sa nalalapit na 2019 FIBA U19 World Cup mula Hunyo 29 hanggang Hulyo 7 sa Heraklion, Greece.

Ayon kay Samahang Basketbol ng Pilipinas (SBP) President Al Panlilio, inaasahan niya ang mas mataas na finish ng Gilas youth kaysa sa mga kuya nito sa Gilas Pilipinas men’s team sa sarili nitong laban sa 2019 FIBA World Cup sa darating naman na Agosto sa China.

“Yung mga kuya n’yo ay maglalaro rin sa World Cup. SBP Chairman Emeritus Manny V. Pangilinan gives them a top 16 finish,” ani Panlilio sa ginanap na Gilas youth sendoff kamakalawa ng gabi sa Meralco Lighthouse. “But I want a better finish for this team. Everybody is behind you so we’re praying for your success.”

Bagama’t babanderahan nga nina 7’2 Sotto at 6’11 Edu, hindi pa rin magiging madali ang misyong iniatas ni Panlilio, ayon kay Gilas youth head coach Sandy Arespacochaga.

“It’s gonna be an uphill battle for us every game. We’ve been telling our boys. Our opponents are stronger. It would require more from us,”ani Panlilio.”It will not be Kai and AJ against our foes but the whole Gilas youth against our opponents. It’s gonna be a collective effort. It’s gonna take a whole team.”

Solido kasi ang magiging kaharap ng 30th-ranked Nationals sa pangunguna nga ng home team at no.15 na Greece gayundin ang no.9 na Argentina at no. 19 na Russia.

Nakatakda namang sumuporta kina Sotto at Edu sina Gerry Abadiano, Bismarck Lina, Geo Chiu, Carl Tamayo, Rhayyan Amsali, Joshua Ramirez, Migs Oczon, Dave Ildefonso, Terrence Fortea, James Spencer at Dalph Panopio –kaya’t tiwala si Arespacochaga na lalaban nang buong puso ang Filipino teens.

Lilipad ang Gilas youth patungong Doha, Qatar sa Hunyo 21 para sa huling bahagi ng kanilang training camp bago tumungo sa Greece sa Hunyo 27.