Creamline hangad ang unang panalo
MANILA, Philippines — Asahan ang matinding paluan tampok ang mga mahuhusay na volleyball players sa bansa sa pagsambulat ng 2019 Premier Volleyball League (PVL) Reinforced Conference ngayong araw sa The Arena sa San Juan City.
Nakasentro ang atensyon sa reigning champion na Creamline na sisimulan ang pagdedepensa sa korona nila laban sa PetroGazz sa alas-4 ng hapon.
Magpapang-abot naman ang Pacific Town-Philippine Army at BaliPure Water Defenders sa alas-2.
Mamanduhan ang atake ng Cool Smashers ni three-time UAAP MVP Alyssa Valdez kasama ang dalawang mahuhusay na imports na sina Kuttika Kaewpin ng Thailand at Aleoscar Blanco ng Venezuela.
“Iyong chemistry ng team hopefully nandoon na kasi since March pa nandito sa Pilipinas ‘yung imports namin. We’ve been practicing for months now. Every team is a contender. Talagang competitive ang mga teams ngayon,” ani Valdez.
Magbibigay ng solidong suporta sina opposite hitter Michele Gumabao, middle blockers Risa Sato at Celine Domingo at sina playmaker Jia Morado at libero Melissa Gohing para makuha ang pambuenamanong panalo ng tropa.
Hindi naman pahuhuli ang Gazz Angels na magpaparada ng matitikas na imports sa ngalan nina Wilma Salas ng Cuba at Janisa Ivette Johnson ng Amerika.
Ito ang ikalawang sunod na taon ni Johnson sa liga kaya’t sanay na ito sa sistema ng laro sa Pilipinas.
Dati siyang naging import ng BaliPure.
Makakasama nina Johnson at Salas sina Paneng Mercado, Jeanette Panaga, Chie Saet, Cherry Rose Nunag, Cai Nepomuceno at Rachel Anne Austero.
Sabik na rin ang Lady Troopers na magbalik-aksyon sa PVL.
Papalo para sa Army sina dating MVP Jovelyn Gonzaga, Honey Royse Tubino, Nene Bautista, Mary Jean Balse, Lutgarda Malaluan at Christine Agno.
Tatapatan sila ng BaliPure sa pamumuno nina imports Danijela Dzakovic ng Montenegro at Slovakian Alexandra Vajdova kasama sina local aces Roselyn Doria, Ivy Lacsina, Princess Robles, Audrey Paran at Jennifer Nierva.
- Latest