Donaire kasado na ang laban kay Inoue
MANILA, Philippines — Kasado na ang paghaharap nina reigning World Boxing Association super bantamweight champion Nonito Donaire Jr. at Japanese superstar Naoya Inoue sa finals ng World Boxing Super Series.
Nasungkit ni Inoue ang puwesto sa finals matapos itarak ang impresibong second-round knockout win laban kay Puerto Rican Emmanuel Rodriguez para ma-unify ang WBA/International Boxing Federation bantamweight belt noong Linggo sa SSE Hydro Arena sa Glasgow, Scotland.
May matikas na 18-0 rekord si Inoue tampok ang 16 knockouts.
Makailang beses pinatumba ni Inoue si Rodriguez.
Naikonekta nito ang lefty hook para paalugin ang Puerto Rican fighter.
Nakalusot si Rodriguez sa naturang round.
Subalit hindi na pinakawalan pa ni Inoue ang panalo nang pulbusin si Rodriguez sa mga sumunod na pangyayari kung saan dumugo ang ilong ng Puerto Rican para tuluyang itigil ang laban.
Pinuri ni Donaire ang matikas na ipinamalas ni Inoue sa laban.
“He did well, it shows where his caliber is and he’s no fluke, he got power, he’s a champion. And that gives me a lot of excitement for this fight. This is what I look for, this is the type of fight that I wane be in,” ani Donaire.
Wala pang petsa ang lugar ng championship bout nina Donaire at Inoue.
Nauna nang umabante sa finals si Donaire nang irehistro ang agresibong sixth-round knockout win laban kay Stephon Young sa semifinals na ginanap sa Cajundome sa Lafayette, Louisiana noong Abril.
Pabor si Donaire na makalaban si Inoue sa finals.
Sa katunayan ay nanood pa nang LIVE si Donaire sa bakbakan nina Inoue at Rodriguez para pag-aralan ang galaw ng Japanese star.
“I saw some flaws I just gotta go back to the drawing board and see where I can take advantage in his movements and distance. I see flaws that definitely I can create a good game plan against him,” ani Donaire.
- Latest
