Impressive si Parks at Stepheson

MANILA, Philippines — Naging impresibo ang PBA debut ni No. 2 overall pick Bobby Ray Parks, Jr., habang halimaw na laro naman ang ipinakita ni balik-import Alex Stepheson.

Sa pagbibida nina Stepheson, Parks at Mike Digregorio ay tinakasan ng Blackwater ang Meralco sa overtime, 94-91 sa pagbubukas ng 2019 PBA Commissioner’s Cup kahapon sa MOA Arena sa Pasay City.

Kumolekta ang 6-foot-4 na si Parks ng 20 points, 8 rebounds, 3 steals at 2 assists at umiskor sina Stepheson, humakot ng 31 boards at Digregorio ng tig-21 markers para sa 1-0 record ng Elite.

“I have to give it to the players for sticking to the game plan. Even though we were down, they stuck together and executed our offense,” sabi ni coach Aris Dimaunahan sa kanyang Blackwater na nakabangon mula sa 11-point deficit, 39-50 sa third quarter para maipuwersa ang extra period, 85-85.

Tumalbog ang libreng jumper ni Trevis Jackson sa panig ng Meralco na nagdala sa laro sa extension.

Ang undergoal stab ni Mac Belo na sinundan ng da-lawang free throws ni Digregorio ang nagbigay sa Elite ng 93-89 abante sa nalalabing 17.7 segundo ng laro.

Muling naidikit ni import Gani Lawal ang Bolts sa 91-93 sa natitirang 11.1 segundo ng bakbakan.

Matapos ang split ni Parks para sa three-point lead ng Blackwater ay nagkaroon ng tsansa si Lawal na maitabla ang Meralco kundi lamang nagmintis ang kanyang 3-point attempt sa pagtunog ng final buzzer.

“Alex (Stepheson) is definitely a great fit for us,” sabi ni Dimaunahan. “As I’ve said before, we were looking for an import who could protect the paint for us.”

Tumapos si Lawal, ang 46th overall pick ng Phoenix Suns noong 2010 NBA Draft, na may 34 points at 21 rebounds para sa Bolts. (Russell Cadayona)