2020 Olympic berth target ni Dormitorio
MANILA, Philippines — Dalawang mahalagang torneo ang lalahukan ni champion rider Ariana Dormitorio sa hangaring makakuha ng tiket sa 2020 Olympic Games sa Tokyo, Japan.
Sasabak ang 22-anyos na si Dormitorio sa 2019 sa Asian Mountain Bike Continental Championship sa Lebanon kasunod ang paglahok sa 30th Southeast Asian Games na pamamahalaan ng bansa sa Nobyembre.
Lalahok si Dormitorio sa Olympic qualifier sa Lebanon sa Hulyo 25-28 kung saan ang pag-angkin niya sa gold medal ang mangangahulugan ng pagkakaroon ng bansa ng unang Filipina cyclist sa Summer Games.
Muling makakaharap ni Dormitorio ang parehong mga riders na nakalaban niya noong 2018 Asian Games sa Indonesia.
“This will be a very crucial year because all of the things that we’ve really worked hard for, ito na iyon. Ito na ‘yung final stretch to get there. We’re really looking forward to the Olympic qualifying, and especially din sa SEA Games kasi it’s going to be the first in my whole career,” sabi ni Dormitorio sa Philippine Sportswriters Association Forum sa Amelie Hotel-Manila noong Martes.
Paboritong manalo ang Filipina sa mountain bike event, kundi lamang siya sumemplang sa second lap ng nasabing five-lap race na nagresulta sa pagkakasibak niya sa medal race.
Makakatapat ng three-time former Asian Mountain bike Series queen ang mga Asiad top riders ng China, Japan, Iran at Kazakhstan.
- Latest