SMB, Magnolia nag-ensayo kahit eleksyon

MANILA, Philippines — Maging ang eleksyon kahapon ay hindi naka­pigil sa paghahanda ng San Miguel at Magnolia para sa Game Seven ng kanilang 2019 PBA Phi­lippine Cup Finals bukas.

Ito ay matapos magsa­nay ang Beermen at Hotshots sa kalagitnaan ng gi­nanap na mid-term elections sa buong bansa.

Upang malabanse ang kanilang responsibilidad sa propesyon, karera at sa bayan, magkaibang atake naman ang ginawa ng da­lawang koponan.

Ang mga players ng San Miguel ay bumoto muna sa kani-kanilang mga lugar sa umaga bago sumalang sa ensayo sa Ac­ropolis Gym sa Quezon City kinahapunan.

“Nag-practice pa rin kami. Pagkaboto namin, diretso na kami sa practice,” ani Beermen head coach Leo Austria na ba­ga­ma’t tubong Quezon Pro­vince ay botante sa Quezon City.

Ayon kay Austria, wa­lang panahon ang kanyang koponan para magpahinga lalo’t hu­ling laro ng serye bukas na siyang makakapagsa­bi kung ma­kukubra ni­la ang ma­ka­saysayang ika-­li­mang su­nod na All-Filipino Cup title.

“Ayaw naming mag­ka­hiwa-hiwalay muna. Tapusin na natin ito hanggang Wednesday. I think with this win, the mo­mentum is on our side. We hope na ma-sus­tain namin itong panalo namin,” pagtatapos ni Austria.

Ang Hotshots naman sa kabilang banda, ay nagsanay muna sa uma­ga sa Ronac Gym sa San Juan City bago umuwi sa kani-kanilang lugar upang bumoto sa hapon.

“Kailangan naming mag-practice bago kami bu­moto,” ani Magnolia coach Chito Victolero.

Hawak ang 3-2 ba­raha, tsansa na sana ng Hotshots na tapusin ang serye subalit nadale sila ng 98-86 panalo ng Beermen sa Game Six upang mapuwers sa Game Se­ven ang dwelo.

“It boils down to one game. Do-or-die game on Wednesday. We’re still positive,” wika ni Victo­lero.