Rockets umusad sa 2nd round

HOUSTON — Hindi na binigyan ng Rockets ng tsansa ang Utah Jazz na mapahaba ang kanilang first-round playoff series.

Tumipa si James Harden ng 26 points para pamunuan ang Houston sa 100-93 pagpapatalsik sa Utah sa Game Five at wakasan ang kanilang serye sa 4-1.

Kumolekta si center Clint Capela ng 16 points at 10 rebounds para sa Rockets, umabante sa Western Conference semifinals sa ikatlong sunod na season at haharapin ang mananalo sa serye ng Golden State Warriors at Los Angeles Clippers.

Ang jump shot ni Ricky Rubio ang naglapit sa Utah sa 93-94 agwat sa huling minuto ng fourth quarter kasunod ang da-lawang free throws ni P.J. Tucker para muling ilayo ang Houston sa 96-93.

Sinupalpal naman ni Harden ang tira ni Jazz center Ruby Gobert na nagresulta sa dalawa niyang free throws para ibigay sa Rockets ang 98-93 bentahe sa natitirang 38 segundo.

Tumapos si Donovan Mitchell na may 12 points kasama ang 0-of-9 three-point attempts para sa Utah kasunod ang 18, 17 at 15 markers nina Royce O’Neal, Rubio at Jae Crowder, ayon sa pagkakasunod.

Sa Oakland, California, tumipa si Lou Williams ng isang fadeaway jumper sa huling 1:29 minuto ng laro at tumapos na may 33 points at 10 assists para tulungan ang Clippers sa 129-121 paggupo sa Warriors sa Game Five ng kanilang serye.

Bagama’t natalo ay bitbit pa rin ng Golden State, nakahugot ng 45 points mula kay Kevin Durant, ang 3-2 bentahe sa kanilang serye ng Los Angeles.

Nag-ambag naman sina Danilo Gallinari at Montrezl Harrell ng 26 at 24 points, ayon sa pagkakasunod habang may 17 markers si Patrick Be-verley, kumuha ng charging foul kay Warriors’ shooter Klay Thompson sa huling 1:40 minuto ng laro, para sa Clippers.