Bacho, Petecio sibak

‘19 Asian Boxing Elite Championships

MANILA, Philippines — Tatlong Pinoy boxers lamang ang umusad sa semis matapos mabigong makahirit ng tiket sina Joel Bacho at Nesthy Petecio na lumasap ng kabiguan sa kani-kanyang dibisyon sa 2019 Asian Boxing Elite Championships na ginaganap sa sa Huamark Indoor Stadium sa Bangkok, Thailand.

Umani ng unanimous decision loss si Bacho kay Mai Maitituersun Oiong ng China sa quarterfinals ng men’s welterweight division.

Binigay ng limang hurado ang 30-27, 30-27, 29-28, 30-27, 30-27 desisyon pabor sa Chinese pug.

Ganito rin ang kinasapitan ni Petecio nang lunikin nito ang 0-5 desisyon kay Manisha Moun ng India sa quarterfinals ng women’s bantamweight class kung saan pare-parehong may 30-27 iskor ang lahat ng judges.

Dahil dito, naiwan ang pasaning makahirit ng puwesto sa finals kina reigning Southeast Asian Games champion John Marvin, dating World Championship gold medallist Josie Gabuco at Ian Clark Bautista.

Makakalaban ni Marvin sa semis si Shinebayar Narmandakh ng Mongolia sa men’s light heavyweight division habang aarangkada si Gabuco kontra kay Mungunsaran Balsan ng Mongolia sa women’s light flyweight category at susuntok si Bautista kontra kay Mirazizbek Mirzahalilov ng Uzbekistan sa men’s bantamweight.