Lady Eagles dinagit ang unang semis ticket
MANILA, Philippines — Napaamo ng Ateneo de Manila University ang National University, 25-14, 24-26, 25-17, 25-19, upang dagitin ang unang tiket sa Final Four ng UAAP Season 81 women’s volleyball tournament kahapon sa Smart Araneta Coliseum.
Tuloy ang matayog na lipad ng Lady Eagles hawak ang 10-1 baraha para pagtibayin ang kapit sa solong pamumuno.
Malaking tulong si Jules Samonte na bumira ng mga importanteng puntos ng laro upang makalikom ng 10 attacks, 2 aces at 1 block para sa Ateneo.
“Team work lang talaga, we played together to get this win. We prepared against NU, we just trusted coach O’s (Oliver Almadro) system and give our best,” ani Samonte.
Isang panalo na lamang ang kailangan ng Lady Eagles para masiguro ang isa sa dalawang ‘twice-to-beat’ incentive sa semis.
Tuluyan nang nasibak ang Lady Bulldogs na nalaglag sa 3-8 baraha.
Sa unang laro, mabilis na dinispatsa ng reigning champion De La Salle University ang Adamson University, 25-15, 25-18, 25-16, para palakasin ang tsansa sa Final Four.
Bumandera si rookie Jolina Dela Cruz nang magtala ng 13 markers at 10 digs para buhatin ang Lady Spikers sa ikawalong panalo sa 11 laro at mapatatag ng kanilang tropa ang kapit sa No. 2 spot.
Nagdagdag naman si team captain Desiree Cheng ng 11 points at kumana sina middle blockers Aduke Ogunsanya at Des Clemente ng pinagsamang 16 hits, at outside hitter Tin Tiamzon ng anim na puntos.
Kumana si playmaker Michelle Cobb ng 18 excellent sets.
Sa men’s division, dumikit ang NU sa ‘twice-to-beat’ advantage matapos patumbahin ang La Salle, 25-20, 25-21, 25-16, at binigo ng Far Eastern University ang University of the East, 25-18, 25-19, 25-12.
- Latest