Knights diretso sa tatlo
MANILA, Philippines – Hindi maawat ang Petron-Letran matapos ibulsa ang ikatlong sunod na tagumpay mula sa 77-70 paggiba sa Family Mart-Enderun sa umiinit na 2019 PBA D-League kahapon sa JSCGO Gym sa Cubao, Quezon City.
Nasa unahan sa halos kabuuan ng laro, abante pa rin sa 66-52 ang Knights sa unang bahagi ng fourth quarter bago magpakawala ng matinding 16-8 birada ang Family Mart para lumapit sa 68-74 sa huling 16.8 segundo sa laro.
Sa kabutihang palad, nasa kampo ng Letran ang oras upang maitakas ang dikit na tagumpay.
Umangat sa 3-1 ang baraha ng Intramuros-based squad papasok sa mahabang break ng PBA D-League.
Titigil muna ang semi-pro league hanggang Abril 4 upang magbigay-daan sa paparating na 2019 PBA All-Star Weekend na gaganapin sa Calasiao, Pangasinan sa Marso 29 hanggang 31.
Katabla ng Letran ang Cignal-Ateneo at Che’Lu Bar and Grill para sa ikatlong puwesto ng Aspirant’s Group.
“We’re still learning. It’s a good win for us against a school-based team. Again, natututo pa rin kami every game,” ani coach Bonnie Tan.
Bumida para sa Knights si Alvin Pasaol na nagbaba ng double-double na 24 points, 10 rebounds at 3 assists.
Solido rin ang ambag ni Jerrick Balanza na may 14 points, habang may double double din na 10 points at 13 boards si Renato Ular.
Sa kabilang banda, tumipa ng 22 points, 5 assists at 4 boards si Valandre Chauca para sa Family Mart.
- Latest