Nuggets ibinangon ni Nikola Jokic

BOSTON - Nagposte si Nikola Jokic ng 21 points at 13 rebounds at bumangon ang Denver Nuggets sa fourth quarter para balikan ang Celtics, 114-105.

Nag-ambag si Will Barton ng 20 points para sa ikaapat na sunod na pananalasa ng Nuggets, inangkin ang playoff spot sa unang pagkakataon sapul noong 2012-13.

Pinamunuan naman ni Kyrie Irving ang Boston mula sa kanyang 30 points, samantalang nagdagdag si Al Horford ng 20 points, 6 rebounds at 6 assists.

Matapos ang mintis na 3-point shot ni Horford para sa Celtics ay nakumpleto naman ni Paul Millsap ang isang four-point play para sa 112-101 bentahe ng Nuggets sa huling 31.3 segundo ng fourth quarter.

Sa San Antonio, dumiretso ang Spurs sa pang-siyam na sunod na ratsada para umangat sa No. 5 seat sa Western Conference.

Nagbagsak si DeMar DeRozan ng 26 points at kumolekta si LaMarcus Aldridge ng 23 points at 13 rebounds para tulu-ngan ang San Antonio sa 111-105 panalo laban sa Golden State Warriors.

Nagdagdag si Rudy Gay ng 17 points kasunod ang 12 markers ni Derrick White para sa Spurs.

Ito ang pang-siyam na sunod na panalo ng San Antonio at ika-11 sa kanilang tahanan para umupo sa No. 5 sa  Western Conference.

Pinangunahan naman ni Stephen Curry ang Golden State mula sa kanyang 25 points kasunod ang 24 markers ni Kevin Durant.

Nanggaling ang Warriors sa two-game winning run at nakatabla ang Denver Nuggets sa first place sa West sa magka-tulad nilang 47-22 record.

Sa Dallas, inungusan ni Dirk Nowitzki si Wilt Chamberlain para sa sixth place sa NBA career scoring list habang inilista naman ni Elfrid Payton ang kanyang pang-limang sunod na triple-double para ihatid ang New Orleans Pelicans sa 129-125 overtime win laban sa Mavericks.

Tumapos si Payton na may 19 points, 11 assists at 10 rebounds para sa New Orleans.

Nagposte naman si Dallas rookie Luka Doncic ng triple-double sa kanyang 29 points, 13 boards at 10 assists.

Nilampasan ni Nowitzki si Chamberlain (31,419 points) sa pamamagitan ng kanyang signature long-range jumpers sa 8:35 minuto ng first quarter.

Sa Phoenix, gumawa si Robin Lopez ng 24 points para igiya ang Chicago Bulls sa 116-101 panalo sa Suns at tapusin ang kanilang five-game losing slump.