AFP Cavaliers winalis ang Senate Defenders sa UNTV Cup Finals

MANILA, Philippines — Hinirang ang Armed Forces of the Philippines bilang unang three-time champion ng UNTV Cup matapos walisin ang Senate sa ka­nilang best-of-three title series sa Smart Arane­ta Coliseum noong Lu­nes.

Bumandera sina Jerry Lumongsod, Darwin Cordero at Boyet Bautista para tulungan ang AFP Cavaliers na talunin ang Senate Defenders, 88-78, sa Game Two.

Nagtala si Lumongsod ng 26 points, 3 assists, 3 steals at 1 rebounds para tanghaling Finals MVP sa seventh season ng torneo.

Nauna nang umiskor si Lumongsod ng 14 points sa kanilang 76-73 paglusot sa Game One.

Nagbida din para sa Cavaliers sina Darwin Cor­dero at dating Letran star guard Boyet Bautista na nagdagdag ng 19 at 18 points, ayon sa pagkakasunod.

May 11 markers naman si Jeffrey Quiambao at nilimitahan si high-scoring Garri Se­villa ng Senate sa 5 points mula sa malam­yang 2-of-10 fieldgoal shooting.

Ang panalo ng AFP ay katumbas ng P4 mil­yon para sa kanilang beneficiary na Education Benefit Systems Office.

Tumanggap din ang Cavaliers, naghari no­ong 2024 at 2016, mula kay UNTV President at CEO Dr. Daniel Razon ng premyong P500,000, habang may P300,000 ang Defenders.

Ang Kythe Foundation, Tahanang Mapag­pa­la Immaculada Concepcion, Inc. at Bahay Pangarap Foundation, Inc. ang napiling beneficiaries ng Senate.

Bukod kay Razon, nanood din sa natu­rang laro kasama si­na UNTV executive Ger­ry Pang­hu­lan, Senators Joel Vil­lanueva at Sonny Angara, Vice Admiral Gaudencio Col­lado, Jr., Major Gen. Ericksson Gloria, Brig. Gen. Arnold Fernandez, Col. Taharudin Piang Am­pa­tuan, Col. Dennis Ma­calintal at Senate Sec­retary Myra Marie Vil­­larica.