Ramirez suportado ang PHINADO
MANILA, Philippines — Solidong suporta ang ibibigay ni Philippine Sports Commission chairman William ‘Butch’ Ramirez sa Philippine National Anti-Doping Organization (PHINADO).
Binuksan kahapon ni Ramirez ang Doping Control Officer Training Course na naglalayong mabigyan ng kaalaman ang mga atleta at coaches ukol sa mga patakaran sa anti-doping.
Ayon kay PHINADO Board Member at Project Director Dr. Alejandro Pineda na mismong si Gobinathan Nair, ang Director General ng SEARADO, ang mamumuno sa mga training lecturers para sa three-day course.
Magtatapos ang training course ngayong araw sa PICC.
Humigit-kumulang sa 20 doctors, nurses, nutritionists, coaches at sports administrators na may doping control background ay bahagi ng listahan ng mga partisipante.
Lahat ng miyembro ng Southeast Asian Games Federation ay nagpadala ng kanilang mga kinatawan sa nasabing event.
Tatalakayin ni Pineda ang mga anti-doping plans ng bansa para sa pangangasiwa sa darating na 30th SEA Games sa Nobyembre bukod pa sa paglalahad ng global at regional perspectives sa doping control at pagbabahagi ng eksperyensa ng mga miyembro ng SEA Games.
Panauhin din sa nasabing training course sina World Anti-Doping Association Director for Asia and Oceania Kazuhiro Hayashi, Director for Program Development and NADO/RADO Relations Tom May, SEARADO head Patrick Goh, ang Sports Physician at International Sports Medicine Specialist, at Sports Medicine specialist Dr. Jose Raul Canlas.
- Latest