Simula na ng kampanya ng Blaze Spikers

MANILA, Philippines — Sisimulan ng powerhouse Petron ang pagdedepensa sa titulo sa pagharap sa PLDT ngayong hapon sa pagpapatuloy ng Philippine Superliga Grand Prix sa The Arena sa San Juan City.

Magtutuos ang Blaze Spikers at Giga Hitters sa alas-2 kasunod ang bakbakan ng United Volley Club at Sta. Lucia Realty sa alas-4:15 at ng duwelo ng F2 Logistics at Cignal sa alas-7 ng gabi.

Nakasentro ang atensiyon sa Petron dahil nagbabalik-aksiyon si American outside hitter Stephanie Niemer na makakatuwang ni power-hitting wing spiker Katherine Bell sa kampanya ng tropa.

Nasa Blaze Spikers na rin si seasoned libero Denden Lazaro para mas lalo pang maging mabangis ang koponan ni Petron coach Shaq Delos Santos.

“We may have a strong team, but this Grand Prix is a wide open race,” ani Delos Santos na aasahan din sina local aces Mika Reyes, Aiza Maizo-Pontillas, Remy Palma, Bernadeth Pons at playmaker Rhea Dimaculangan.

Tiwala naman si PLDT mentor coach Gorayeb na makakasabay ang kanyang bataan sa pangunguna nina American imports Grace Lazard at Kendra Dahlke.

Makakatuwang nina Lazard at Dahlke sina Jasmine Nabor, Aiko Urdas at Lou Ann Latigay.

Sa kabilang banda, ibabandera ng F2 Logistics si veteran reinforcement Lindsay Stalzer at Italian-American Becky Perry na makakatulong nina Aby Maraño, Ara Galang, Kianna Dy, Dawn Macandili, Majoy Baron at Kim Fajardo.

Bitbit ni Stalzer ang tatlong korona – dalawa sa Foton at isa sa Petron – at isang MVP award para ituring na may pinakamagandang dekorasyon sa lahat ng imports.

Subalit hindi pa makalalaro si Stalzer dahil kasalukuyan pa itong nasa Indonesia para samahan ang Jakarta BNI Taplus sa finals ng Indonesian Proliga.