Lady Maroons, Lady Tams buwenamano sa UAAP 81
MANILA, Philippines — Dumaan muna sa butas ng karayom ang University of the Philippines Lady Maroons bago nagwagi kontra sa University of the East Lady Warriors, 25-12, 22-25, 23-25, 25-19, 15-12, sa pagsisimula ng UAAP Season 81 volleyball tournament sa FilOil Flying V Arena sa San Juan City kahapon.
Sa ikalawang laro, tinakasan ng Far Eastern University Tamaraws ang National University Lady Bulldogs, 22-25, 25-19, 25-19, 25-12.
Nagkaroon si Lady Bulldogs rookie setter Joyme Cagande ng left knee sprain matapos ang banggaan nila ni Roselyn Doria sa third set.
Matapos sa kanilang madaling panalo sa first set, 25-12, nawalan ng depensa ang Lady Maroons kaya naunahan sila ng Lady Warriors.
Ngunit bumawi sina Tots Carlos, Isa Molde, Maris Layug, Justine Dorog, Lorie Bernardo at Arielle Estrañero para itabla ang laro sa 1-1.
Huling lumapit ang Lady Warriors sa atake ni Laiza Bendong, 7-8, sa deciding fifth set pero humataw sina Jessma Ramos at Molde ng tatlong sunod na puntos upang lumayo sa 11-8.
Umiskor si Molde ng 23 points kabilang na ang 19 atake, 2 aces at 2 blocks, habang si Carlos ay nagtala ng 15 points para malampasan ng tropa ni coach Godfrey Okumu ang opening day jinx.
Si Estrañero ay nagposte ng 43 excellent sets para sa UP.
Sa men’s division, binuksan naman ng UE Red Warriors ang bagong season sa pamamagitan ng 20-25, 25-10, 25-22, 25-21 panalo laban sa UP Fighting Maroons, habang ginulat ng FEU Tamaraws ang nagdedepensang NU Bulldogs via straight sets, 25-12, 25-18, 25-17.
Samantala, sisimulan ng ‘three-peat’ champion La Salle Lady Spikers ang hangad na ikaapat sunod na korona sa pagharap sa Ateneo Lady Eagles ngayong alas-4 ng hapon matapos ang laban ng Adamson Lady Falcons at UST Tigresses sa alas-2 sa Mall of Asia Arena sa Pasay City.
Pamumunuan ni Desiree Cheng ang Lady Spikers kasama sina Lourdes Clemente, Michelle Cobb, May Luna, Carmel Saga, Aduke Ogunsanya at Ernestine Tiamzon.
Sina Danielle Ravena, Deanna Wong, Julieanne Samonte, Kat Tolentino, Bea de Leon at Madeleine Madayag naman ang itatapat ng Lady Eagles.
- Latest