Pangatlo ng Arellano
NCAA Women’s Volleyball
MANILA, Philippines — Nasawata ng Arellano University ang paghahabol ng University of Perpetual Help System Dalta nang itatak ang 22-25, 25-15, 25-18, 25-18 panalo sa Game Three upang matamis na makumpleto ang ‘three-peat’ kahapon sa NCAA Season 94 women’s volleyball tournament sa The Arena sa San Juan City.
Balanseng atake ang inilatag ng Lady Chiefs tampok ang pagbibida ni outside hitter Regine Arocha upang mapanatili sa kanilang teritoryo ang kampeonato.
Humataw si Arocha ng 16 puntos at 11 receptions, habang nagbigay ng solidong suporta si wing spiker Princess Bello na nagdagdag ng 12 markers at 18 digs para sa Lady Chiefs.
Nag-ambag naman sina Season MVP Nicole Ebuen at Carla Donato ng tig-11 puntos, samantalang may 20 excellent sets naman si Rhea Ramirez.
Itinanghal na Finals MVP sa ikalawang sunod na taon si Arocha.
Mainit ang simulan ng Lady Altas nang pamunuan nina Cindy Imbo, Syra Umandal at Jenny Gaviola ang ratsada para makuha ang 1-0 bentahe.
Subalit mabilis na nakabawi ang Lady Chiefs sa likod nina Arocha, Ebuen at Bello na siyang bumandera sa mga sumunod na sets upang tuluyang wasakin ang pangarap ng Lady Altas.
Tanging 12 puntos lamang ang nagawa ni Imbo sa panig ng Lady Altas at may tig-10 naman sina Umandal at Jenny Gaviola.
Tinapos ng Arellano ang best-of-three championship series sa 2-1 panalo talo.
Nakauna ang Lady Altas nang kunin ang Game One bago maiselyo ng Lady Chiefs ang five-setter win sa Game Two para maipuwersa ang rubber match.
Sa panalong ito ay nagawang pigilan ng Arellano ang tangkang triple crown ng Perpetual Help.
Nauna nang nagkampeon ang Altas sa men’s division at Junior Altas sa juniors’ class.
- Latest