Thompson humataw para sa warriors

LOS ANGELES — Nagposte si Klay Thompson ng isang NBA record matapos isalpak ang una niyang 10 tangka sa three-point range at tumapos na may 44 points sa 130-111 pagdurog ng Golden State Warriors laban sa Lakers.

Pinantayan ng Golden State ang kanilang season high na pang-walong sunod na ratsada.

Tumipa si Thompson ng 10-of-11 shooting sa 3-point line para sa pang-pitong dikit na panalo ng two-time defending champions sa kanilang road games.

Umiskor ang star guard ng 23-points sa third quarter tampok ang kanyang pitong triples para ilista ng Warriors ang 36-point lead laban sa Lakers.

Nagdagdag si Kevin Durant ng 20 points habang nagsumite si Stephen Curry ng 11 points at 12 assists para sa Golden State.

Binanderahan naman ni Ivica Zubac ang Los Angeles sa kanyang 18 points kasunod ang 17 at 16 markers nina Brandon Ingram at Kyle Kuzma, ayon sa pagkakasunod.

Naglaro ang Lakers na wala sina primary ball-handlers at playmakers LeBron James, Lonzo Ball at Rajon Rondo.

Sa Salt Lake City, humataw si Damian Lillard ng 26 points at iniskor ni Jusuf Nurkic ang 17 sa kanyang 22 markers sa third quarter para pamunuan ang Portland Trail Blazers sa 109-104 panalo kontra sa Utah Jazz.

Kumolekta ang Bla-zers ng 30 assists para tapusin ang six-game winning streak ng Jazz.

Humakot din si Nurkic ng 9 rebounds, 7 assists at 6 blocks habang nag-ambag si CJ McCollum ng 14 points para sa Portland, naipanalo ang pito sa huli nilang siyam na laro.

Nagpasabog naman si Donovan Mitchell ng 36 points sa panig ng Utah, nakahugot kay Jae Crowder ng 15 markers, samantalang kumolekta si Rudy Gobert ng 10 points, 13 rebounds at 4 blocks.

Sa Philadelphia, nag-salansan si Joel Embiid ng 32 points at 14 rebounds para pamunuan ang 76ers sa 121-93 paggupo kay James Harden at sa Houston Rockets.

Binanderahan ni Harden, napiling Western Conference Player of the Week noong Lunes, ang Houston sa kanyang 37 points.

Hindi naman naglaro para sa Philadelphia si four-time All-Star Jimmy Butler (sore right wrist).

Si veteran guard Corey Brewer, pinapirma ng 76ers sa isang 10-day contract, ang pumalit kay Butler sa starting line-up at pinahirapan sa depensa si Harden.