Thunder inilusot ni George

PHILADELPHIA — Kinumpleto ni Paul George ang mahalagang four-point play sa natitirang 5.1 segundo para tulungan ang Oklahoma City Thunder na ilusot ang 117-115 panalo laban kay center Joel Embiid at sa 76ers.

Itinampok sa laro ang mga hard foul nina Russell Westbrook at Embiid sa isa’t isa. Lumagapak sa sahig si Westbrook sa ilalim ng basket matapos bigyan ng foul ni Embiid, habang na-foul out naman si Westbrook sa huling 14.9 segundo matapos ang foul kay Embiid sa three-point line.

Itinabla ni Embiid ang Philadelphia sa 113-113 mula sa kanyang tatlong foul shots at ang driving layup ni Jimmy Butler ang naglagay sa kanila sa unahan, 115-113 sa huling 6.9 segundo.

Ngunit isinalpak ni George ang isang triple mula sa foul ni Butler at kinumpleto ang 4-point play para sa 117-115 bentahe ng Oklahoma City.

Ito ang ika-19 sunod na panalo ng Thunder laban sa 76ers.

Tumapos si George na may 31 points, 6 rebounds, 5 assists at 3 steals, habang nagtala si Westbrook ng 21 points, 10 rebounds at 6 assists para sa Oklahoma City, nakahugot kay reserve Dennis Schroder ng 21 points.

Humakot naman si Embiid ng 31 points, 8 rebounds at 6 assists sa panig ng Philadelphia habang nagdagdag si JJ Redick ng 22 points at nagposte si Ben Simmons ng 20 points, 15 rebounds at 9 assists.

Sa Denver, kumolekta si Nikola Jokic ng 19 points, 12 assists at 11 rebounds para sa kanyang ikaanim na triple-double ngayong season para igiya ang Nuggets sa 124-102 paggupo sa Cleveland Cavaliers.

Umiskor naman si Jamal Murray ng 26 points para sa ikatlong panalo ng Denver sa huli nilang apat na laro, samantalang nag-ambag sina Trey Lyles at Monte Morris ng 16 at 15 markers, ayon sa pagkakasunod.